VJ Kaibigan Ako po si Len asawang inulilang lubos ni Venjo. Anim na taon ng pagiging magkaibigan dahil kay Ginny. Siyam na taon ng pagiging magkasintahan. Dalawang taon ng pagiging mag-asawa. Eksakto ngayong araw na ito isang buwan na mula ng magdiwang kami ng ikalawang anibersaryong kasal mga panahong aming pinagsamahan. ///// Dama kong bawat isa sa atin ay may pagtangi kay Venjo o kaya ay sa kanyang mga minamahal. Sa mga panahon ng aming pagsasama ay tunay na nabuhay kaming ganap ang kasiyahan sa kabila ng aming mga kinakaharap na mahirap pag-daanan. Sadyang madaming nagyayari sa bawat araw. Pero kahit naiiyak kaming dalawa sa hirap, aaliwin ako palagi ni Venjo sa pagsasabing hindi bale masaya at andito pa rin tayo 'di ba? Tuloy ang buhay. ///// Malalim na tao si Venjo. Kahit napakadali siyang makaibigan, mahirap ganap na malaman at maunawaan ang pag-ibig sa kaloob-looban ng kanyang puso. Pinalad ako na nitong huling buwan ng kanyang buhay ay nagawa kong mabatid ang laman ng kanyang puso kahit wala siyang sinasabi, nabigyan namin ito ng pangalan sa aming huling usapan ng gabing bago siya pumanaw nasabi at naipahayag niya lahat- lahat. ///// Kahit may problema hindi nawawala ang pagpapatawa kay Venjo. Pareho kami na madalas natatawa at nakakatapo ng dahilan upang tumawa. Maraming malulutong na halakhak ang pinagsaluhan kasama lalo na ang mga San Beda boys at si Atoy nitong mga huling sandali ng aming buhay. Ang isang madalas na biro niya sa akin ay ang magkunwaring masakit and dibdib niya at di siya makahinga. Siyempre natataranta ako 'pag malapit na ako umiyak sa takot bigla siyang tatawa ng malakas at sasabihin "Hon, practice lang para pag totoong namatay ako ay sanay ka na." Sabi ko sa kanya, pag totoong namatay ka dahil lagi mo akong niloloko hindi na ako maniniwala. Kaya hanggang ngayon hinihintay kong sabihin niya na practice lang lahat ito. Biro lang. ///// Bago kami ikasal alam ko na may sakit siya at maaring konti lang ang panahon na aming ipagsasama. Pero sa araw ng aming kasal ay nasulat sa Phil. Star na ayon daw sa Hindu tradition napaka swerte ng araw na iyon kayat lahat ng ikakasal sa araw na ito ay magsasama ng 7 lifetimes. Ang patawa nga dito ni Venjo kawawa naman daw siya pitong habang buhay and kanyang sentensya na isang babae lang ang kasama. Paano naman daw yung ibang magaganda na makikita niya? Dalawang taon lang kaming nagsama bilang mag- asawa pero masasabi ko na ang saya, pagmamahalan at pagkakaibigan na pinagsaluhan naming ay katumbas ng saya na madadanas sa pitong lifetime. ///// Walang pinipiling tao si Venjo. Malapit siya lao na sa mga karaniwang tao. Mahal na mahal niya si Nato (yon nga unang gusto niyang pakasalan at makasama kung magunaw ang mundo). Sila Marlyn, Dadyn, Rolly, Ningning, Doreng, Edoy, Rey, Berto, Kula, Totong, Dante at lahat-lahat ng nagsilbi sa kanya. Pati na 'yung Chef ng Shanghai Bistro na nagluluto ng paborito nyang pansit. Na hindi naming pareho alam ang pangalan. ///// Maraming kahinaan at pagkukulang si Venjo. Pero sa kanyang sariling paraan ay nakakapagpuno siya at nakabawi. Kaya nga kung may hinihingi yan ang hirap tanggihan dahil sa kanyang kakaibang charisma. ///// Isa sa magandang ugali na natutuhan ko kay Venjo ay ang palaging sabihin ang salamat po. Malaki o maliit man na kabutihan paulit-ulit niyang pasasalamatan. Lagi bago kami matulog sasabihin niya ang "Salamat ha." Kaya nga po gusto ko sabihin sa inyong lahat ang pasasalamat namin sa inyong pagiging narito at sa lahat ng kabutihang inyong pinadarama ngayong napakalungkot ng aming pamilya. Gusto ko rin sabihin kay Venjo na "Salamat pards!" ///// Masakit at mahirap man ang aking pinagdaanan ngayon pero kahit ilang milyong beses handa kong paulit-ulit na danasin basta ikaw, Venjo, and aking makakapiling.